ئاشتی، به خاوه‌ندارێتی له‌رێبازی تێکۆشانی فه‌رمانده سمکۆ مسۆگه‌ر ده‌بێت
22 تشرینی یه‌كه‌م, 2015رژێمی داگیرکه‌ری کۆماری ئیسلامی ئێران له‌درێژایی ته‌مه‌نی ده‌سه‌ڵاتداری تا به ئه‌مڕۆ له‌پێناو بێ‌ئیراده‌و بێ‌ناسنامه کردنی گه‌لی کورد، چرکه ساتێک درێغی نه‌کردووه. تایبه‌ت به په‌ره‌پێدانی سیاسه‌تی شه‌ڕی تایبه‌ت سه‌رجه‌م هێز و لایه‌نه پێشه‌نگه‌کانی کۆمه‌ڵگا پاکتاو و بێ‌کاریگه‌ر کرد و کۆمه‌ڵگاشی په‌لکێشی چه‌مکی بێ‌هیوایی و بێ‌باوه‌ڕی کردووه. به‌ڵام به په‌ره‌سه‌ندنی فه‌لسه‌فه‌و رامانی ئاپۆیی و دامه‌زراندنی پارتی ژیانی ئازادی کوردستان (PJAK)، گورزێکی کوشنده له‌سیاسه‌تی شه‌ڕانگێزی و فاشیستی رژێمی داگیرکه‌ری ئێران ده‌درێت. چۆنکه به‌به‌شداری گه‌نجانی پێشه‌نگ وه‌ک؛ عاکیفه‌کان، هێمن ه‌کان، سمکۆکان، زیلانه‌کان و … هتد بۆ نێو ریزه‌کانی گه‌ریلا قۆناخێکی نوێ به ناوی شۆڕشی ژیانه‌وه له‌رۆژهه‌ڵاتی کوردستان ده‌ستپێده‌کات.
به پێچه‌وانه‌وه کاربه‌ده‌ستانی رژێم چاویان به‌و قۆناخه تازه هه‌ڵنه‌هات و بۆ له‌ناو بردنی ئه‌و ده‌رفه‌ته مێژووییه هه‌ڵمه‌تی پاکتاوکاریان ده‌ستپێکرد و تا به‌ئه‌مڕۆش به‌رده‌وامه. به‌تایبه‌ت به بره‌ودانی سیاسه‌تی به‌کرێگیراوی، بڵاوکردنه‌وه‌ی مادده‌ی هۆشبه‌ر، له‌سێداره‌دان، گرتن، ئه‌شکه‌نجه، تیزاب پژاندنه سه‌ر ژنان و ده‌ستدرێژی کردنه سه‌ر نرخ و که‌رامه‌تی گه‌ل و به ده‌یان کرده‌وه‌ی چه‌په‌ڵی تر له‌هه‌وڵدان دان تا کۆسپ و ته‌گه‌ره له‌به‌رده‌م تێکۆشانی ره‌وای گه‌لی کورد و گه‌ریلاکانی PJAK دروست بکه‌ن. سه‌ره‌ڕای ئه‌وه‌ش رژێم نه‌یتوانی به‌و کرده‌وانه سنوور له‌به‌رده‌م خه‌باتی ئازادیخوازی گه‌لی کورد دابنێت و تا ده‌ڕوات گه‌لی کورد نزیکی ئازادی ده‌بێته‌وه‌و ئه‌وه‌ش رژێمی تۆقاندووه. بۆیه بۆ فریودانی لایه‌نگرانی خۆی جارێکی تر رۆخساری شه‌ڕانگێزی و نه‌گریسانه‌ی خۆی له‌ساڵی 2011 به ئامانجی پاکتاوکردن و دامرکاندنی تێکۆشانی ره‌وای PJAK، به سوپایه‌کی 30 هه‌زار که‌سی و پێشکه‌وتووترین ته‌کنۆلۆژیای شه‌ڕه‌وه هێرشیان کرده سه‌ر قه‌ندیل. به‌ڵام گه‌ریلاکانمان و هێزه‌کانی رۆژهه‌ڵاتی کوردستان(HRK) له‌دژی ئه‌و هێرشه هه‌مه‌لایه‌نه، به که‌مترین ئیمکانه‌وه به‌رخۆدانێکی بێ‌وێنه‌مان ئه‌نجام دا و حه‌ماسه‌ی قه‌ندیل مان بۆ گه‌له‌که‌مان تۆمار کرد و ده‌رئه‌نجامی ئه‌و شه‌ڕه‌ش نزیک به هه‌زار چه‌کداری رژێمی ئێران کوژران و ئه‌وه‌ش رژێمی تووشی شکستێکی گه‌وره‌ی سیاسی، سه‌ربازی، ئابووری و دیبلۆماسی کرد و کاریگه‌ریه‌کانی ئه‌و شه‌ڕه‌ش رژێمی تا ئه‌مڕۆ له په‌له‌قاژه رزگار نه‌کردووه‌و رژێم له‌و راستیه‌ش خۆی ده‌دزێته‌وه. هه‌ڵبه‌ت ئه‌و به‌رخۆدان و سه‌رکه‌وتنه مێژووییه‌ی ئه‌فسانه‌ی شه‌ڕی قه‌ندیل به هونه‌ری شه‌ڕ و تایبه‌تمه‌ندی فه‌رماندارێتی شه‌هیدی نه‌مرمان سمکۆ سه‌رهه‌ڵدان و 22 هه‌ڤاڵی هاوسه‌نگه‌ری که قاره‌مانانه په‌یوه‌ستی کاروانی شه‌هیدان بوون، تۆمار ده‌کرێت.
فه‌رمانده شه‌هید سمکۆ له 2ی سپتامبر 2011 واتا رۆژێک دوای رۆژی جیهانی ئاشتی که هه‌ر که‌س بانگه‌وازی کۆتایی هێنان شه‌ڕ و به‌رقه‌راری ئاشتی ده‌کرد، له‌لایه‌ن رژێمی شه‌ڕانگێزی ئێرانه‌وه شه‌هید ده‌بێت. ئه‌وه‌ش به‌ڵگه‌ی سه‌لمێنه‌ری ئه‌وه‌یه که سه‌رجه‌م هه‌وڵه‌کانی فه‌رمانده سمکۆ له‌پێناو به‌رقه‌راری ئاشتی و دیموکراسی له‌ناوچه‌که‌دا بووه. بۆیه تاکه رێگای گه‌ره‌نتی ئاشتی له‌رۆژهه‌ڵاتی کوردستان و ئێران درێژه‌پێدان به رێبازی تێکۆشانی فه‌رمانده سمکۆ مسۆگه‌ر ده‌بێت. فه‌رمانده سمکۆ به تێگه‌هێشتن له‌رێبازی نوێى فه‌رماندارێتى، بۆ پیاده کردن و دامه‌زراندنى هێلى تازه‌ى به‌رێوه‌به‌رى و فه‌رماندارێـتیه‌کى کارامه و پێشکه‌وتوو به بێ‌پسانه‌وه تێکۆشانی کرد. هه‌موو ساته‌کانی ژیانى شۆڕشگێڕی وانه‌ى سه‌رکه‌وتن بوو بۆ گه‌له‌که‌ی. بناغه‌دانه‌رى خه‌تى فه‌رماندارێتى هاوچه‌رخه. به تێپه‌ڕاندنى عه‌قلییه‌تى کلاسیکی فه‌رماندارێتى به زهنیه‌ت و ئه‌ندێشه‌یه‌کى نوێ و رۆحى هه‌ڤاڵێتى و له‌خۆبووردوویى و به ئه‌خلاق و پره‌نسیبی شۆڕشگێڕی، ئاسۆیه‌کى تازه‌ى بۆ گه‌له‌که‌ی و هێزه‌کانی گه‌ریلا کرده‌وه. هه‌روه‌ها به تێكۆشانی خۆی خاوه‌ندارێتی له رێچکه و ده‌ستکه‌وته‌کانی رێبه‌ری یه‌کێتی جووتیاران و کۆمه‌ڵه، کاک فواد موسته‌فا سولتانی کرد و له‌پێناو به‌دیهێنانی هیواکانی و سه‌رجه‌م شه‌هیده سه‌ربه‌رزه‌کانی گه‌له‌که‌مان تا دوا ساته‌کانی ژیانی ئه‌رکی هه‌ڤاڵێتی و شۆڕشگێڕانه‌ی خۆی پێکهێنا. بۆیه له‌چواره‌مین ساڵیادی شه‌هید بوونى فه‌رماندارى مه‌زن مان هه‌ڤاڵ سمکۆ که دوو رۆژ دوای 31هه‌مین ساڵیادی شه‌هاده‌تی کاک فواده و رۆژی ئاشتی جیهانیش پردی نێوان دوو فه‌رمانده‌ی مه‌زنی گه‌له‌که‌مانه، له‌که‌سایه‌تی کاک فواد و هه‌ڤاڵ سمکۆ جارێکیتر به‌ڵێن و سۆزى خۆمان له پێناو به‌رز راگرتنى حه‌ماسه‌ى قه‌ندیل و درێژه‌پێدان به رێبازى پیرۆزى شه‌هیدانى ئه‌و حه‌ماسه‌یه و سه‌رجه‌م شه‌هیدانى رێگاى ئازادى کوردستان، دووپات ده‌که‌ینه‌وه و هه‌تا وه‌دیهاتنى ئاشتی و دیموکراسی فیداکارانه درێژه به‌تێکۆشانی ره‌وامان ده‌ده‌ین.
له‌کۆتاییدا رژێمی فاشیستی ئێران هۆشیار ده‌که‌ینه‌وه که له‌ئه‌گه‌ری به‌رده‌وام کردنی سیاسه‌تی نکۆڵی کارانه‌ی، گه‌لی کورد لێگه‌ڕینی بۆ ژیانێکی ئازاد و دیموکرات ده‌بێت و ئیدی سیاسه‌تی سه‌رکوتکارانه‌ی رژێم قه‌بووڵ ناکات و پێویسته رژێم ئیراده‌ی سیاسی گه‌له‌که‌مان په‌سه‌ند بکات و کۆتایی به‌سیاسه‌تی کۆمه‌ڵکوژی و قڕکردنی کلتووری بێنێت. هاوکات بانگه‌وازی له‌سه‌رجه‌م گه‌لانی ئێران و گه‌نجان و ژنانی رۆژهه‌ڵاتی کوردستان ده‌که‌ین که خاوه‌ندارێتی له‌ره‌نجی بێ‌وچانی که‌سایه‌تی شۆڕشگێڕی گه‌له‌که‌مان فه‌رمانده سمکۆ بکه‌ن که له‌پێناو به‌دیهێنانی ئاشتی و دیموکراسی و پته‌وکردنی یه‌کێتی و یه‌کڕیزی نێوان گه‌لانی ئازادیخواز و دیموکراتیخواز گیانیان به‌خت کردووه. هاوکات به به‌شداریان بۆ ناو یه‌کینه‌کانی پاراستنی رۆژهه‌ڵاتی کوردستان خاوه‌ندارێتی له‌ده‌ستکه‌وته‌کانی گه‌له‌که‌مان له‌هه‌رچوار لای کوردستان و ناوچه‌که بکه‌ن.
مه‌جلیسی پارتی ژیانی ئازادی کوردستان (PJAK)
02/09/2015