وریشه مورادی ناسراو به جوانا سنه له كوێیه؟
31 تشرینی یه‌كه‌م, 2023ئه‌كاده‌میای شه‌هید زیلان په‌پوله – کژار
له‌م ڕۆژه‌ی كه ژیان له‌لایان پیاوانی ده‌سه‌ڵاتدار داگیر كرا له ئازادیش بێگانه بووین. چونكه هه‌موو پێوان و پێوه‌رەکانی ژیان و مرۆڤه‌كان له ده‌وری زهنیه‌تی پیاوسالاری كۆكراوه‌ته‌وه، ره‌گه‌زگه‌رایە و له ئازادی و یه‌كسانی دووره، چونكه ته‌واوی خه‌یاڵ، هیوا و ئارمانج له‌ناو ده‌بات و بیست و چوار كاتژمێر ره‌نج و نرخ و جوانیه‌كانی ژیان بۆ به‌رژه‌وه‌ندی ده‌سه‌ڵاتی خۆی بەكار ده‌هێنێت.لەم سیستەمە دا ئه‌گه‌ر كه‌سێك یاخۆد رێكخراوێك له به‌رامبه‌ر ئه‌م زهنیه‌ته خاوه‌ن هه‌ڵوێست بێت و تێكۆشانێكی هه‌بێت، سزا ئەدرێت! بە چ تاوانێک؟ دژایه‌تی خودا کردووە! دژایاتی یاسا کردووە! لە سیستەمی ئێران دا خودا فكری ده‌سه‌ڵاتداره، یاساش پاراستنی ده‌سه‌ڵاته! زیندان له‌ناو زینداندا دروست كرواته‌وه، دونیایان كردووه به زیندانێكی كراوه و زیندانیش كراوه‌ته‌وه به گۆڕستانی مرۆڤی ئازاد و یەکسانی خواز. ڕفاندن و گوشه‌گیری، ئه‌شكه‌نجه و زه‌خت ناتوانێت رێگری له تێكۆشان و به‌رخودانی فكرهی ئازادیخواز بكات.
ئه‌گه‌ر سه‌یری درێژای مێژووی ده‌سه‌ڵاتی پیاوسالاری بكه‌ین ده‌بینین كه ئه‌و كه‌سانه‌ی تێرۆر كراون، له‌سێداره دراون، ڕفێندراون و چاره‌نوسیان دیار نییه، هه‌موو پێشه‌نگ، رێبه‌ر، خاوه‌ن هه‌ڵوێست و دژی زهنیه‌تی یه‌ك دسه‌تی و نایه‌كسانی و نادادپه‌روه‌ری بوونە. رژێمی فاشیستی ئێران به ته‌واوی دژی ئازادی مرۆڤەکان و بە تایبەتی دژی ژنه. هه‌موو یاساكانی بۆ خزمەت بە پیاو ساز ده‌كات، جا ئه‌گه‌ر بێت و ته‌ڤگه‌ری ژنان، چالاكوانی مافی ژنان دژی ئه‌م موحافه‌زه‌كاره تێكۆشان بكه‌ن، هه‌رچی هێزی هه‌یه ده‌خاته گه‌ڕ و له به‌رامبه‌ری شه‌ڕ ڕاده‌گێنێت. وریشه مورادی یه‌كێك له‌و ژنه چالاكوانانه‌یه كه ده‌وڵه‌تی سێداره لێی ده‌ترسێت. هۆكاری ترس و له‌رزی رژێم له ده‌ستدانی حكومه‌تی خۆیه. چونكه وریشه پێشه‌نگ و تێكۆشه‌ری مافی ژنان بوو، زۆر ئاساییه كه له گه‌ڵ ژنان دیدار ئه‌نجام بدات و بۆ هه‌موو جوره كێشه‌كانیان چاره‌سه‌ری بدوزێته‌وه و رێكخستنیان بكات. رۆژانه ژنان روبه‌ڕوی ئه‌شكه‌نجه و كوشتن ده‌بن، له ته‌مه‌نی منداڵیدا به شو ده‌درێن، بازرگانیان پێ ده‌كه‌ن، خزمه‌تكاری بێ پاره و بنه‌مای سیاسه‌تی شه‌ڕی تایبه‌ت و هه‌موو شه‌ڕی ده‌رونییەکانی ده‌وڵه‌تن.
ئێستا ئه‌گه‌ر به هێز بوونی ژنان به واتای ڕووخانی ده‌وڵه‌تی پیاوانه، كه‌واتا ده‌توانن گۆڕانكاری له‌و زهنیه‌ته دروست بكه‌ن، نه‌ك ژنانی پێشه‌نگ و تێكۆشه‌رانی وه‌ك وریشه مورادی بڕفێنن و ونی كه‌ن. هه‌موومان له چاره‌نوسی ئه‌م هاوڕێیه‌مان نیگه‌رانین، پێویسته ده‌وله‌تی دژه ژن به ئێمه بڵێت كه وریشه له كوێیه؟ بێده‌نگی نه‌فره‌ت و توڕه‌یی ئێمه زیاد ده‌كات. هه‌موو ژنان له ئێران و رۆژهه‌ڵاتی كوردستان، به‌تایبه‌تیش ژنانی چالاكوان، سیاسته‌تمه‌دار، هونه‌رمه‌ند، تێكۆشه‌ران، ئازادیخوازان، وره‌زشكاران، ڕۆشنبیران، مامۆستایان، دكتور، خوێندكار، كرێكار خاوه‌نداری له وریشه مورادی بكه‌ن، چونكه وریشه ده‌نگ و ئیراده‌ی هه‌مووتان و هه‌موومانه.
وریشه مورادی كه ژنێكی سیاسه‌تمه‌دار بوو بۆ مافی هه‌موو كه‌سێك تێكۆشانی ده‌كرد، به‌تایبه‌تیش به ئیراده كردنی ژنانی بە ئارمانجی سه‌رتایی خۆی ده‌زانی، بۆ یه‌كسانی نێوان ژن و پیاو له كۆمه‌ڵگاێكی دیموكراتیكدا تێکۆشانی دەکرد. ده‌بێت خاوه‌نداری له ئارمانج، فكر و باوه‌ڕی وریشه بكه‌ین. هه‌موومان پێكه‌وه به هێزین و ده‌توانین چاره‌نوسی ئه‌و ژنه پێشه‌نگه بگۆڕین، هاوڕێ وریشه بڕوای به‌و هێزه بوو كه به یه‌كێتی ژنان و یه‌ك هه‌ڵوێستی ژنان ده‌رده‌كه‌وێت. پێویستیمان به یه‌كتر هه‌یه، ده‌بێت ئه‌رك و به‌رپرسیاری خۆمان به جێ بهێنین و وریشه مورادی ئازاد بكه‌ین. ئازادی له قه‌فه‌سه‌كانی زیندانی كراوه و داخراوه مسۆگه‌ر بكه‌ین. چیتر رێگه نه‌ده‌ین كه زهنیته‌تی به‌رژه‌وه‌ندی په‌ره‌ست سه‌ربكه‌وێت.
هه‌موومان ببین به زه‌ینه‌ب جه‌لالیان و وریشه، سپیده و نرگس و هه‌وو ژنانی ئازادیخواز و ئه‌و چاره‌نوسه‌ی كه ده‌سه‌ڵات هه‌وڵده‌دات بەسەرماندا بسەپێنێت و بڵێت پێشه‌نگان دژه خودان و ده‌بێت سزا بدرێن، بگۆڕین. ئه‌وانی كه تێده‌كۆشن بڕوایان به گۆڕینی ئه‌م حكایه‌ته ساخته‌یه نییه، هه‌ر بۆیه باوه‌ڕیان به ژیانی ئازاد و یه‌كسان هه‌یه. ته‌نیا ئێمه‌ین كه ده‌توانین وریشه مورادی ئازاد بكه‌ین.
كەمپینی وریشه له كوێیه هه‌ڵمه‌تێكە بۆ دەستپێکردن بۆ بەدواداچوون بۆ وریشە، به‌ڵام ده‌بێت زۆر له‌وە زیاتر چالاكی و هه‌وڵدان بكرێت تاكوو بتوانین ئاگاداری ره‌وشی هاوڕێمان بین.