ساڵی ''٤٩''ەو ئۆمەرلی شڵەژاوە

کۆڵانەکانی سینگی ئۆمەرلی چاوەڕوانن

لە ماڵێکی قوڕینی ئەم گوندەدا

دایکێکی تینووی تۆڵە

ژان دەیگرێ و

چاوەڕوانی هاتنی میوانێکی

بچکۆلانەی تۆڵە سێنەرە

دیرۆکی

پشت چەماوەی گۆچان بەدەستی

ئاگری بێ دەنگی دەی سوتێنێ و

ئەویش وەك نیسان و ئۆمەرلی و دایە عوەیش

چاوەڕوانی لەدایك بوونی

ئیبڕاهیمێکی تر دەکەن

بەڵکو ئەویش……

لەگەڵ لەدایکبوونیدا

پیسیەتی ڕووی مێژووی دوای ئیبڕاهیم

بە یەکەم نووزەی گریانی ئەم کۆرپەیە پاک بکات و

سوار چاکی سەدەێکی نوێی پێببەخشێ

نیسان چاوەڕوانە و بە دیاری لەگەڵ خۆیدا مژدە دەهێنێ

بە گوێی کوردستان و خەواڵوەکاندا دەچرپێنێ و

مژدەی تازە میوانی لاوچاکی پێیە

ئیتر لەو ڕۆژەوە

هەر بستە خاکێکی وڵات سات بە سات

ژیلەمۆی خنکاوی گەش دەبێتەوە

باڵای ئەویش ڕۆژ بە ڕۆژ

لەگەڵ چیاکاندا باڵا دەگرێ و

بە ئاوی کانیاوەکانی داستانی ئەشقێکی مەزن

لە دڵیدا چرۆ دەکاو شیری تۆڵە

لە نامەردەکان دەکێشێ.

''٢٧'' سەرماوەز ئەو تینووە

ئەسپی شۆڕەش تاو دەدات و دەچێت بە گشت زەبەلاحەکاندا

هەبونیان لێ دەستێنێت و بە ماچێکی ژیانەوە بە بووکی کوردستان دەبەخشێ

بەیەکەوە تاهەتایە سەمای ئازادی دەکەین و ڕێگای وڵاتی خۆرستان دەگرینە بەر.

بێ ئارام هاوار ئەکەین بێ ڕاوەستان

مەشخەڵی نەمری دادەگیرسێنن