هەڵبژاردنی سەرۆککۆماری ئێران لە کاتێکدا بەرێوە دەچێت کە کۆماری ئیسلامی ئێران دەرەتانێکی دیمۆکراتیکی بۆ هەڵبژارتن نەهێشتۆوەتەو ئێرادەی گشتی کۆمەڵگە لە بەر چاو نەگیراوە، بە تایبەتی کۆمەلگەی ژنان، پێکهاتە کەلتووری- ئائینی و مەزهەبیەکانیتر لە ئێران دا بە نەبو ئەژمار دەکرێن. ئەمە خوی لە خوی دا نیشان دەدات کە رژێمی خوێنمژ و دژە ژن و دژە کۆمەڵگە چەندە لە پێوەرو پرەنسیپە هاوچەرخ و دیمۆکراتیکەکان بە دور و نامۆیە.

لە روانگەی ئەم رژێمە تەنیا لە کاتی رەوایەتی دان بە رژێمەکەی بە رێگەی هەڵبژارتن ژنانی دەکەیێتەوە بیر. وەگەرنا ئەو رژێمە هیچ ‌‌‌‌‌حەسابێک بۆ ئێرادەی ژنان و گەنجان و پێکهاتەکانی تری ئێران نەکردووە و ناکات.

ماوەی سێ ساڵە شۆڕشی «ژن ژیان ئازادی» لە بەرانبەر ئەو سەرکوتکاری، بێ عەداڵەتی، بێ مافی، نا دیمۆکراتی و نامرۆڤی رژێم ڕاپەڕین. بەڵام جارێکی تر وەکو پیشەی هەمیشەیی رژێم بە ریگەی دام و دەزگای سەرکوتکارەکانی بە شێوەیەکی وەحشییانە پەلاماری گەلانی راپەڕیووی دا و بە هەزاران ژن و گەنجی کۆمەڵکوژ و بە هەزارانی بریندار کرد و لە گرتوخانەکان دا بەندیانیی کردووە. رژیم ئێسلامی ئێران تەنانەت بە هونەرمەند، مامۆستا، وەرزشکار، دەرهێنەر، پیشەوەر رەحمی نەکرد و پەلاماری ئەوانیشی دا و هەر یەکەیانی بە شێوەیەک لە شێوەکان سزا دا.

چالاکوانانی ماڤی مرۆڤ، مافی ژنان، ژینگە پارێزان، منداڵپاریزان و چالاکوانانی بواری هونەری کردە ئامانجی سەرکوتکاریەکانی و ئێستاش کە رژێم بە هۆی سیاسەتە دژە کۆمەڵگە و نەتەوەیەکان تەنگەتاو بووە دەیهەوێ جارێکی تر بۆ مانەوەی دەسەڵاتداریەتی و سیاسەتی ملهۆرانەی بە پێشاندانی چەند کەسایەتیەکی سووتاوی رژێم کۆمەڵگەی ژنان و بە گشتی کۆمەڵگەی ئێران چەواشە و بە لارێدا ببات. رژێمی داگیرکەری ئێران ئێدی رەوایەتی هزری- سیاسی خۆی لە نێو کۆڵگەی ئیران و بە تایبەت ژنان و گەنجاندا لە دەست داوە و ئەو گەلەی کە دەنگی ئازادیخوازانەی بە گۆی هەموو دونیا گەیشتووە فرێوی فرت و فێڵەکانی رژێمی داگیرکەری ئێران ناخۆات و دەنگی خۆی بۆ درێژکردنەوەی تەمەنی ئەو رژێمە دیکتاتۆرە بە کار ناهێنی.

وەک کۆمەڵگەی ژنانی ئازادی رۆژهەڵاتی کوردستان”کەژار” لەو باوەرەداین ژنان رۆژهەڵاتی کوردستان و ئێران ئەو ئاڵایەی بۆ ئازادی و دادپەروەری کۆمەڵایەتی بەرزیان کردووەتەوە بە خۆ رێکخستنکردن و پتەوکردنی ریزەکانیان ئاڵای ئازادی زیاتر بشەکێننەوە و هاوشان لە گەڵ چین و توێژەکانی تری کۆمەڵگە برەو بە خۆڕاگری و بەرخۆدانی خۆیان بدەن و دەنگی خۆیان بخەنە پاڵ دەنگی بەرخوەدانی ژنانی بەرخودێری زیندانەکانی رژێم لەوانە”گوڵرۆخ ئیریایی، سپیدە قەلیان، زەینەب جەلالیان، وریشە مورادی، و پەخشان عەزیزی و …. هتد و ئەو هەڵبژارتنە فۆرماڵیتەی رژێمی ئێران بە شێوەیەکی رێکخستن کراو و چالاک بایکۆت بکەن.

لەو بڕوایەداین کە ژنان لە رۆژهەڵاتی کوردستان ، ئێران خاوەن ئەزمون و وزەن کە دەتوانن بە بەشداربوونی خۆیان لە بایکۆتکردنی هەڵبژارتنی سەرۆککۆماری ئێراندا، رژێمی ئێران روبەروی بەرپرسیارێتی کۆمەڵایەتی و مێژوویی خوی بکەنەوە. رژیمی داگیرکەری ئیرانیش پێویستە بزانێ کە بەو هەڵبژارتنە فۆرمالیتە و نمایشیە ناتوانێت خۆی لە کێشەکانی کۆمەڵگای ئێران و کێشە دەرەکیەکان قوتار بکات.

کوردیناسیونی کۆمەڵگای ژنانی ئازادی رۆژهەڵاتی کوردستان”کەژار”

٦-٤-١٤٠٣ هەتاوی